第209期台灣教師聯盟會務通報

◎感謝富美老師，伊定定來台北辦公室tàu做khang-khoè，lán辦公室kàu-taⁿ猶m̄-bat請工讀生，因為有富美老師put-sî來做義工。

◎3月13，何忠錦老師ê大後生娶某（補請）兼大查某孫度chè請客，恭喜伊做公ㄚ，何老師毋但無收lán聯盟包ê紅包，閣買一箱56本記事本送親友，2009年ê記事本，伊mā買200外本，感謝何老師，一直攏chiah-ní thīn聯盟。

◎ 1月29，Koeh Iàn-lîm老師陪山腳教會青少年團契去埔里tshit-thô，下poo tshüa教會青少年去參觀霧峰明台高中，höo教會青少年體驗林獻堂對台灣ê貢獻。

◎舊年盟員王藝臻老師ê合唱團解散事件，到目前（2010.03.27）為止，台中市教育處beh淡化處理。不過王老師無失志，堅持為台灣音樂打拚，這種精神非常可敬，4月初1督學第1擺到怹學校調查，藝臻老師請理事長去做見證人。有關西屯音樂事件發展，請看本期附件【一】。

◎ 秘書長Koeh Iàn-lîm老師佇山腳教會ê Family團契（每個月第四主日禮拜suah)開台灣白話字ê課，希望透過白話字課程來加強長老教會信徒ê台灣意識。

◎秘書長Koeh Iàn-lîm老師kap苗栗縣聯合社合作出國小南一版三年、四年、五年ê華語考卷，其中ê三年kap五年考卷ê「閱讀測驗」特別選錄蘭大弼醫師kap台東賣菜婦仁人陳樹菊ê故事，利用出「閱讀測驗」ê機會來宣揚台灣文化是一ê真好ê舞台。

◎3月初3，理事長去柳原教會拜訪陳聖賢牧師，牧師真認同lán舉辦創意升旗比賽，mā答應教會至少組兩隊來參加比賽。

◎lán聯盟是公民監督國會聯盟ê加盟團體，3月初4理事長去公督盟參加立法委員評鑑ê特殊事蹟複評會議。

◎馬區長民調直直落，想欲實施『不在籍投票』，贏2012年總統大選，怹喙講這關係人權，實在是teh顧怹ê政權。過去軍中作票ê情形真嚴重，lán對國民黨無信心，所以理事長去參加3月初5佇內政部ê抗議活動，未當予—伊實施。

◎3月14是中國制定反分裂國家法紀念日，3月初6佇台大校友會館有1場中國制定反分裂國家法5週年ê座談會，理事長有去參加。

◎3月初7，理事長去龍山寺參加ABC（ㄚ扁俱樂部），大腳ㄚ劇團瓊文團長真拍拚賣手札，成績袂bái，賣13本1300，加上林雙不集3本600，總共收入1900kho。

◎最後1擺『八田』ê讀書會佇3月12舉行。4 月初2舉辦聚餐聯誼，決議繼續讀人權ê主題，時間改拜三暗，第1擺4月14，看鄭南榕追思會ê影片。

◎3月13，民進黨佇台北市政府廣場辦『民主3月，創意市集』，lán聯盟有pâi 1 ê擔仔位，理事長、溫校長佮張禎賢老師攏來tàu-saⁿ-kāng。

◎3月14佇柳原教會開理監事會，出席率真koân，彼工天氣有khà熱，陳聖賢牧師真親切閣體貼，開冷氣予阮吹。

◎3月17，理事長去台北高等行政法院，旁聽蕭曉玲老師ê案件審判，針對學校，律師提出真濟疑點要求澄清，希望這次行政官司曉玲老師會當拍贏，討回公道。

◎鄭文堂導演ê電影「眼淚」3月21佇國立苑裡高中視聽室上演，這齣電影有法度佇苑裡播出是因為民進黨中央黨部族群事物部李介媚小姐ê爭取，因為伊本身是苑裡ê出外人，當伊知影這齣戲，主動爭取去故鄉苑裡演出ê機會。「眼淚」是探討警察食案kap烏白刑求ê故事，母語發音，真值得盟員收看。相片是導演親身來會場kap觀眾互相討論ê情形。

◎lán辦公室舊年搬來台北，施並錫教授有來辦公室拜訪閣買記事本。3月25彼工，施教授佇師大開畫展—施老師的油畫風景課， lán辦公室tú佇師大附近，所以理事長tō chhoā若淇去參加，kā伊祝賀。

◎3月26，聯盟發公文予日本在台交流協會，邀請日本駐台代表ィマィ タダシ（今井正）來烏山頭研習營致詞。

◎3月27，秘書長Koeh Iàn-lîm老師tshüa山腳國小囝仔去苗栗市巨蛋參加「苗栗縣健身操暨創編運動操」比賽，利用比賽ê làng-phang時間去參觀苗栗鐵道公園，體驗台灣鐵道文化，siâng時mä加強其他tshüa隊老師ê本土文化意識。這部分是借用公家ê行政資源推銷台灣課程，會tàng tsiânn做在職老師tshüa囝仔對外去比賽ê「暗步」。

◎3月28咱聯盟kap其他ê本土社團佇台灣北社辦公室召開「抵抗中國史觀ê台灣史」記者會，而且mä公開要求民進黨蔡英文主席ài針對教育部高中歷史教科書「去台灣化」表態，bë-sài kek外外。記者會由南社鄭正煜社長發起兼主持，鄭社長ê肝癌已經惡化，伊無歇睏猶閣teh參流亡偽中國政權車拚，大家攏真感動，拜託伊欲疼惜台灣mā愛照顧家己ê身體。

◎4月初2、初3秘書長Koeh Iàn-lîm老師任教ê山腳國小去台南進行教師自強活動，4月初2暗時túa烏山頭西拉雅大飯店，höo老師體驗烏山頭風情。這ê行程會安排去烏山頭水庫，主要是Koeh Iàn-lîm老師透過kap學校人事主任ê交陪，人事主任有認同八田技師ê理念，特別將烏山頭水庫列入行程。

◎五月份苗栗縣山腳國小beh進行台語比賽，除了演講kap朗讀比賽以外，koh新增加台語字音字型比賽，因為學校老師對台語ê拼音教學無自信，教學組長委託秘書長Koeh Iàn-lîm老師訓練三年~六年12 ê小朋友，而且學校提供買台語字典ê經費。這部分是借用學校ê學藝比賽增加本土文化部分，sûn-suah設計學校開錢來買台語字典，增加本土文化出版利sûn。

◎秘書長Koeh Iàn-lîm老師beh出版「八田與一和我們の故事」，mä按算beh佇「烏山頭水庫愛語研習營」邀請4位小朋友做新冊發表會。目前研習營kan-tann 6 ê報名，希望盟員kë khoo朋友來參加營隊，來替嘉南平洋ê母親烏山頭水庫做母親節生日。

◎4月28拜三下poo 13：30秘書長Koeh Iàn-lîm老師beh佇山腳國小進行台語教材教法研習，歡迎盟員踴躍參加。