◎10月31暗時7點半，秘書長Koeh Iàn-lîm老師去台南縣政府南區服務中心演藝廳欣賞「少年西拉雅」囝仔戲團表演。這ê戲齣是由台南縣善化舞蹈團體「梵羽舞蹈藝術團」表演，in表演ê內容是採用南瀛之美「少年西拉雅」這本圖畫冊，將圖畫冊內容以舞蹈故事戲劇ê內容來做展現，故事真精采，非常適合國小囝仔欣賞。這ê音樂舞蹈戲teh描寫荷蘭少年戴格kap西拉雅少年加農因為梅花鹿結緣ê故事，khah可惜是表演地點雖然是佇台南縣，但是戲劇表演無法度用台語iah是西拉雅語來做口白，tse代表咱ê母語教育ài koh繼續加強。
◎11月初4「八田來了」佇南科樹谷文化園區舉行頭映會，現場人tshah-tshah-tshah,，主辦單位邀請民眾連署簽名推動烏山頭水利系統登陸世界文化遺產，觀眾熱情響應。11月初9秘書長Iàn-lîm老師tshüa山腳國小3 ê小朋友kap山腳國小五甲鄭瑋旻老師參加台北場頭映會，翁倩玉小姐kap李登輝先生mä到場欣賞。2場頭映會相比，南部鬧熱滾滾，北部sio-khùa稀微。「八田來了」透過2 ê日本囝kap ê無ài車水ê台灣囝仔來講台日和平打拚追夢，主角Hatta Yoichi顛倒變做配角，內底有真濟台灣民謠kap日本歌，真適合大人kap囝仔欣賞。另外水色嘉南12月初2暗時8點佇客家台重播，歡迎盟員欣賞。
◎11月11秘書長Iàn-lîm老師去竹南國小參加讀報教育研習，tsia ê讀報所講ê是「國語日報」。國語日報善用「讀報教育」名義höo公部門來幫in thui-sak報紙，這種ê「置入性行銷」非常值得咱台派社團學習。國語日報內底其實本土化ê教材mä不止濟，現職ê國小盟員老師何妨借內底ê本土新聞來教囝仔，siâng時koh khah有心ê老師會tàng向國語日報申請讀報實驗班，來做本土語文領域ê補充教材。
◎11月14~15二工聯盟去國境之南舉辦理監事會，以實際行動來挺南台灣觀光發展，詳細過程請看秘書若淇ê心得。16 號會長kap台灣南社社長鄭正煜佇高雄市市中一路召開台灣國記事本記者會，希望盟員老師多多行銷記事本。
◎11月19核四公投苦行來kàu苑裡，苑裡ê盟員林雀薇老師、阮文池老師、林銘達老師lóng有到場。苦行隊伍最後佇苑北活動中心放陳麗貴ê「吹泡泡」紀錄片來做結束。公投苦行詳細路程表請盟員參考http://www.nuke.com/
◎11月25秘書長Iàn-lîm老師去苑裡國小參加台語研習，內底有一份由鄭安住先生提供ê文件表示，原本應該佇一百學年度通過本土語言認證（原住民語、客語、台語）ê現職教師不得擔任本土語言教學ê條文已經刪除。Tse表示教育部ê母語教學政策行回頭路，無要求老師通過認證，母語教學放牛食草。這場佇苑裡國小ê研習講師是許正勳，伊是通用派大將，he真tsë時間teh khau-sè台羅拼音。苗栗縣ê台語進修課程長期以來lóng是通用派ê老師teh教台羅，成效無好ê原因在佇無推廣台語文學讀本kap台文電腦輸入法，致使苗栗縣由現職老師教ê台語課有真濟是放影帶ah是錄音帶來教學，通用派講師無法度利用電腦資訊來教在職老師是真嚴重ê miss。Beh phah破這ê現狀可能ài有台羅派人馬入去苗栗縣台語輔導團，tsiah有法度改善這種食碗內洗碗外現象。
◎11月25民視報導台中盟員王藝臻老師佇台中市西屯國小指導ê低年級「古錐囝仔幼幼合唱團」莫名其妙被學校要求解散，26號台中市議員陳淑華佇台中市議會質詢，胡志強市長表示會要求督學深入調查。王藝臻老師長期創作台語囝仔歌，伊ê用心看西屯ê囝仔唱台語歌唱kah hiah歡喜tö知；但是西屯國小ê行政團隊對母語合唱團ê協助無夠，所以「古錐囝仔幼幼合唱團」佇6月底收山，王藝臻老師雖然感覺無tshài，但是樹枝孤鳥，無奈歎三聲！11月22核四公投苦行行到台中市，李淑惠老師替王藝臻老師不平，表達王藝臻老師ê心聲höo陳淑華市議員知。咱台灣教師聯盟佇tsia真肯定王藝臻老師對母語教育ê用心，伊所tú著ê困境，咱聯盟會tàu聲援，捍衛老師ê教學專業kap囝仔ê母語學習權，請盟員關心王藝臻老師，kä伊加油！
◎11月28聯盟佇台北市海霸王餐廳舉辦募款餐會，現場氣氛強強滾，真濟本土社團領導者mä到場致意，感謝盟員踴躍支持。
◎11月29王康陸博士紀念基金會佇東海大學舉辦「反對承認中國學歷kap中國學生來台讀冊」研討會，邀請鄭麗君、薛化元、陳茂雄來發表專題演講，下底是研討會重點。
【1】採認中國學歷ê問題：2000年行政院bat通過採認中國學歷ê辦法，但因為辦法無tsiâu，加上民意批判kap監察院糾正，尾手「封存」無實施。馬統講開放中國學歷無開放考證照ê講法是白賊，因為立委管碧玲2008年指出按照「專門職業及技術人員考試法第24條」規定，外國人是會tàng佇台灣參加專職kap技術人員考試。Koh khah嚴重ê是若採認中國學歷，無可能干單採認中國人民ê學歷，台灣人民ê中國學歷mä ài採認。
【2】開放中生來台讀大學kap研究所ê問題：開放中生來讀大學這部分會衝擊台灣高等教育資源ê分配，影響台灣學生讀大學ê權利，可比講師生比比例降低、大學系所名額中生khah佔贏面；開放中生來讀研究所這部分，台灣被逼承認中生ê中國大學學歷，siâng時台生ê中國大學學歷mä ài承認。
【3】鼓勵台商全面西進中國：無承認中國學歷，台商會留後步，子弟會佇台灣讀冊；承認中國學歷，等於鼓勵台商子弟讀中國學校，中國進一步達成思想統戰kap經統，最後目的是政治統一。
【4】台灣私立大學招無學生：kap經濟三通kang款，台灣學生去讀中國大學贏過中生來台讀大學，教育部ê「三限、六不」lóng是騙人。
【5】國家安全làng-kàng:共產黨學生來台讀冊，衝擊台灣社會治安；台生sa中國學歷考台灣公家頭路，台灣公家政府水準大退步。研討會結論：開放中國學歷＝台灣自殺，咱一定ài反對承認中國學歷，bë-sài kiu-kiu讓步。
◎12月初5 ê縣議員選舉，參選宜蘭縣第一選區ê賴瑞鼎老師以5949票當選；參選嘉義市第一選區ê林瑞霞老師以1834票落選；佇澎湖代表綠黨參選ê林長興老師以843票落選；屏東縣ê曹啟鴻老師以270402票連任成功。
◎陳福當老師長期培育母語師資，訓練在職老師讀寫台語文，鼓舞老師發表台語文佇台文通訊kap台文bong報，對母語教育真用心，咱聯盟佇tsia beh感謝陳福當老師。
◎由陳主顯博士所編寫ê《台灣俗諺語典》【前衛出版】得著Hungary(匈牙利)諺語學者Gyula博士 ê推薦，編入去2010年《諺語著作年鑑》。主編《諺語著作年鑑》ê Mieder教授表示陳主顯博士開12年ê時間出版10本《台灣俗諺語典》，是台灣ê英雄人物。陳主顯博士表示台灣人應該以台灣文化裝備自己，用優美ê台灣心智kap行動，顯出島國之民ê尊嚴kap修養，欲怎樣做，方法真濟，其中之一就是「甘願、用心讀台灣ê好冊」！
◎為著鼓勵大眾使用台語工具書來復興台語文化，而且發展以台語書寫ê台灣文學，成大台灣語文測驗中心舉辦查台語辭典比賽，報名時間tùi 2009年12月1日至12月31日止，一律網路報名（http://ctlt.twl.ncku.edu.tw/tj/），無接受現場報名，比賽地點佇台南市立圖書館（公園北路3號），比賽時間是2010年1月23日（禮拜六）e-poo 2:00-4:00（2小時）。請盟員老師踴躍鼓勵學生參加。
◎「2010年建國手冊」到目前才銷5000本，後手猶有5000本，拜託所有盟員老師湊三工，緊去探聽當選ê縣市鄉鎮長佮議員，若有欲感謝金主佮支持者，請in湊助印「思相起台灣」來送，友好團体助印100本以上才算1本120若定，若需要理事長親身去拜訪，請敲手機0933-579456，理事長會趕緊拚去。「2010年建國手冊」ê推銷毋是商品ê販賣，是建國理念ê推捒，拜託大家盡力協助，真努力！
沒有留言:
張貼留言